Cherokee Unicode Sample

The Cherokee Language Kit for OS X can be used to create just about any type of text that uses the Cherokee script.

This page is encoded as Unicode (utf-8) and requires a compatible browser like Opera (or Safari under OS X 10.3) and a properly encoded Cherokee font. If you don't own the Cherokee Language Kit for OS X and don't use a Macintosh, you can view a PDF version of this file.

ᏣᎳᎩ ᎤᏂᏃᎮᏅᎯ
ᏧᏃᏪᎳᏅᎢ
ᎠᎵᏣᏙ ᏩᏘ ᎪᏕᏍᎩ
ᎠᎴ ᏫᎵ ᎡᏙᎯ
ᎤᎾᎵᏍᏕᎸᏓ
ᎠᏂᏴᏫᏯ ᏚᎾᏙᎥ ᎠᎴ ᎠᏲᏩᏁᎬ
ᏗᏎᏍᏗ

     ᎪᎯᎩ ᏥᎨᏒᎩ ᎠᏂᏣᎳᎩ ᏌᏊᎭ ᎤᏂᎮ ᏚᎾᏙᎥᎢ. ᎣᏂᏃ ᎢᏴᎢ ᏂᎦᏗ ᎨᎦᏎᏍᏗ ᏄᎵᎦᏔᏁᎢ ᎾᏊ ᎠᏎ ᏔᎵ ᏚᎾᏙᎥ ᏱᏓᎾᏓᏁᎭ ᎩᎳ ᎨᎦᏎᏍᏗᏍᎨᎢ. ᏌᏊᎭᏃ ᎨᏒ ᏴᏫ ᏔᎵ ᏱᏚᏙᎠ ᎩᎳ ᎦᏰᏥᏁᏗ ᎨᏎ ᎠᎦᏎᏍᏗ ᎨᏒᎢ. ᎾᏊᏃ ᏴᏫ ᎨᎦᏍᏔᏅ ᎤᏅᏒᏊ ᎠᏂᏩᏘᏍᎬ ᏔᎵᏁ ᏫᎨᏒ ᏧᎾᏙᏍᏙᏗ ᎾᏁᎵᏍᎬᏃ ᎯᎠ ᎠᏲᏩᏁᎦᏊ ᎦᏪᏟᎭᏊ ᎠᎾᏗᏍᎬᎢ. ᎾᏍᎩ ᎠᏎ ᎢᏳᏍᏗ ᎤᎧᏜᏛ ᎠᎹ ᎠᎴ ᎤᏃᏴᎩᎦᎸᎾ ᎠᎴ ᏎᎷᏧᏩᏂᎨᎢ ᎠᎴ ᎤᏩᏬᏛ ᎠᎴ ᎠᎹᎤᏍᎦᏎᏗ ᏥᏚᎾᏙᎠ.

     ᏌᏊ ᎢᏳᏩᎫᏗ ᎠᏲᏩᏁᎬ ᎤᎷᏤᎢ ᏚᎾᏢᏁ ᎤᏂᏣᏘ ᎠᎭᏂ ᏧᏂᎸᏫᏍᏓᏁᏗᏱ ᏩᏥᏂ ᎤᏤᎵᎦ. ᏂᎦᏛᏃ ᎠᏲᏩᏁᎬ ᏗᎪᏪᎵ ᏕᎦᏁᎲ ᏗᏎᏍᏗ ᏗᎨᎪᏪᎵ. ᎣᎩᏃᎯᏎᎸ ᎣᎦᏎᏍᏛ ᏙᏗᎪᎵᏰᎢᏏᏒᎢ ᏱᏙᏥᏁᎸ ᏙᎦᏙᎥᎢ. ᏧᏬᏪᎶᏗᏃ ᏙᎦᏙᎥ ᏕᎦᏁᎲ ᏗᎪᏪᎵ. ᏚᎪᎵᏰᎠᏃ ᎢᎬᏱ ᏗᏎᏍᏗ ᏧᎳᏍᎩ ᏁᏩᏓ ᎤᏓᏃᎯᏎᎸ ᏚᏙᎥᎢ. ᎾᎿᏊ ᎤᏲᎯᏍᏔᏅ ᎠᏲᏩᏁᎬ ᏕᎪᏪᎵᏍᎬᎢ. ᎯᎠ ᏄᏪᏒᎩᎧ. ᏄᎳ ᎢᏥᏍᎦᏯ. ᎤᎵᏍᎨᏓ ᎾᏏ. ᎯᎠ ᏗᎦᎸᏫᏍᏓᏁᏗᎢ. ᏚᏳᎪᏛ ᏗᏍᎩᎥᏏᏕᏣᏙᎥᎢ ᏗᏉᏪᎶᏗᏃ ᎠᎭᏂ ᎪᏪᎵᎢ. Ꮭ ᏯᏆᏚᎵ ᏧᎦᎸᏓ ᎢᏥᏬᏂᏏᏓᏍᏗᎢ ᎠᏴ ᎨᏙᎲᎢ.

     ᎪᎯᏗᏃ ᎢᏳ ᎣᏂ ᏙᎢ ᏄᎾᏛ ᏁᎸ ᏴᏫ ᎩᎳ ᎤᏙᎯᏳᎾᏁᎴ ᏚᏳ ᎪᏛ ᏚᎾᏙᎥᎢ. ᏅᎩᏁᏃ ᏗᎪᏪᎸ ᎤᎪᎵᏰᎠ. Ꮭ ᏱᎦᏅᏓᏗᎠ ᎤᏙᎯᏳ ᏔᏬᏗᏗᏲᎯᎯ ᏬᏱ ᎠᎴ ᏥᏍᏆᎦᏙᎬ ᏄᏬᏛᎾ ᏱᎩ. ᎾᏍᎩᏊᎴ ᏱᎩ ᎾᎤᏛᏐᏅ ᎠᏍᎦᏯ ᏆᎾᏗᎩᏍᎩ ᏆᎾᏗᎩᏍᎩ.

 

ᎤᏪᏘ ᏄᎵᏍᏔᏂᏙᎸ ᏓᎦᏏ ᎠᎾᎩᎸᏗᏍᎩ

     ᏌᏊ ᎢᏳᏩᎫᏘ ᏅᎩ ᏯᏂᏓ ᎠᏂᏧᏣ ᎠᏁᎮᎢ ᎨᏒᎢ ᏓᎾᏁᎲᏍᎨᎢ. ᎤᎵᏍᏗᏃ ᎤᏂᎪᎮ ᎤᏔᎾ ᏓᎦᏏ ᎠᎢᏎ ᎠᏂᏧᏣᏃ ᎤᏬᏡᏗ ᎤᏁᎵᏎ ᎢᏳᏃ ᏳᎾᎩᎸᏔᎾ ᏓᎦᏏ. ᏙᎯᏳᏃ ᎤᎾᎩᎸᎾᏃ ᎤᏕᎵᎬ ᏫᏚᏭᎪᏔᏁᎢ.

     ᎪᎯᏃ ᎢᏴᏓ ᎤᏛᏐᏅᎯ ᎦᏙᎨ ᎠᎾᎢᏒᎢ ᎯᎠᏃ ᏂᏚᏪᏎᎴᎢ ᎠᏣᏠᎯ. ᏞᏍᏗ ᏰᏣᎩᎸᏕᏍᏗ ᏓᎦᏏ ᎠᏎᏃ Ꮭ ᏳᎾᏠᏎᎢ. ᎯᎠ ᏄᏂᏪᏎᎢ ᎤᏬᏡᏗᏳᏃᎦᏛᎾᏕᎦ ᎤᎾᏚᎵᏍᎨᎢᏃ ᏏᏊ ᏂᎦᏯᎢᏒᏊ ᎨᏒᎢ ᎤᎾᏠᎯᏍᏗᎢ. ᎢᏣᏠᎯ ᎾᏊ. ᎠᏂᏧᏣᏃ ᎯᎠ ᏄᏂᏪᏎᎢ ᏂᎦᎥ ᎪᎱᏍᏗ ᎣᏏᏊ ᎨᏎᏍᏗ ᎾᏍᏊ ᏓᎦᏏ ᎠᎺᏉᎯ ᏱᏭᎷᏣ ᏲᏣᎵᏔᏚᎦ ᎠᏏ ᏫᏄᎷᏨᎾᏊ ᎠᎺᏉᎯ. ᏙᏳᏃ ᏂᎬᏩᎾᎩᎴᏊᏃ ᎤᏕᎵᎬ ᏗᏜ ᎤᏛᏐᏅ ᎯᏃ ᏓᏍᏓᏩᏗᏎ ᎣᏂ.

     ᏓᎦᏏᏃ ᎠᎺᏉ ᏭᎷᏤ ᎠᏂᏧᏣ ᎤᎾᎵᏔᏗᏅᏗ ᏚᏄᎪᏔᏁᎢ. ᎠᏎᏃ ᎤᏂᏄᎸᏁᎢ. ᏧᎾᏔᏍᏕᏂ ᏚᏩᎭᏙᏎᎢ ᏓᎦᏏᎢ ᏚᏂᎾᏫᏛᎮᏃ ᎠᎺᏉ ᎭᏫᏂ. ᏚᎪᎭᏃ ᎤᏛᎮᏃ ᎠᎦᏔᎿᎢ ᎤᏟᏍᏗᏳ ᎠᎹᏳᎶᏗ ᏭᎷᏤᎢ ᎠᎴ ᎤᏬᏢᏁ ᎤᏬᏘ ᎤᏬᏘᏃ ᎢᎧᏲᏔ ᏁᎢᏃ ᎠᎺᏉᎯ ᎠᏂᏧᏣᏃ ᎨᏥᏍᏕᎸᎮᎢ.

 

ᎠᎬᏱ ᏧᏓᎴᏅ ᎤᏬᏗ

     ᎪᎯᎩ ᏥᎨᏒ ᎠᏂᏴᏫᏯ ᎠᏂᎧᎵ ᎠᏂᏣᎳᎩ ᏥᎨᏒ ᎤᏟᏂᎩᏗ ᎨᏒ ᎤᏂᎲ ᏅᏗᎦᎵᏍᏙᏗᏍᎨ ᏄᏧᏰᎲᎾ ᏥᎨᏎ ᎤᏂᎩᎬᎯ ᏌᏊ ᎢᏳᏩᎫᏘ ᎤᏂᏥᏈᏍᏗ ᏚᏂᏢᏤ ᎠᎴ ᎤᏂᎪᏩᏘ ᏴᏫ ᏚᏂᏲᎱᏎ. ᏝᏃ ᏳᎾᏅᏖᏃᎵᏙᎳ ᎠᎴ ᏓᏂᎪᏩ ᏘᏍᎨ ᏧᏬᏚᎯ ᏚᏪᏴ ᏙᏓᎸᏃ ᎠᎴ ᏧᏃᏚᎯ ᏥᏍᏆ ᎠᏂᏃᎯᎵᏙᎲ ᎠᎴ ᎠᎹ ᎠᎴᏍᏯ ᏧᏃᏚᎯ ᎠᏣᏗ ᎠᎴ ᎣᏍᏓ ᏗᎦᏰᏍᏗ ᎠᎴ ᎠᎹᏱ ᏱᏗᎩᎩᏌ ᏧᏂᎵᏬᎢᏍᏗ. ᏴᏫᏃ ᎠᎾᏓᏅᏏᏍᎬ ᎪᎱᏍᏗ ᎤᏣᏘᏂ ᏂᎦᎵᏍᏔᏂᏙᎲ ᏅᏗᎦᎵᏍᏙ ᏗᏍᎨ ᏓᏂᏲᎱᏍᎬ ᎣᏍᏓᏃ ᏄᏍᏗᏓᏅ ᏂᎬᎢ.

     ᎤᎾᏓᏅ ᏖᎳᏃ ᏴᏫ ᏚᎸᎪᎳᏁᎢ ᎩᎶ ᎢᏳᏍᏗ ᎡᎲᎢ ᎤᏬᏢᏅᏅᎯ. ᎤᎾᏓᏅᏖᎴᏃ ᏳᎾᏛᏁᏗ ᎤᏂᏅᏍᏗ ᎩᎶ ᎤᏩᏛᏗᎢ ᎠᎴ ᎤᎾᏛᏗᏗᎢ ᏯᏛᏁᏗᎢ ᏚᏂᏢᎬ ᎠᎴ ᏚᏂᎯᎲ ᎾᏂᎥ. ᏙᎯᏳ ᏚᎾᏑᏰᏎ ᎦᎵᏉᎩ ᏯᏂᏓ ᎠᏂᎦᏔᎿᎢ ᎠᏂᏍᎦᏯ ᎾᏂᎥ ᎨᏥᎸᏉᏗ. ᎠᎴ ᎠᏃᏍᏗ ᎠᏂᏍᎦᏯ ᎠᏂᏯᎪᎩ ᏂᎦᏒᎾ. ᎾᏍᎩᏃ ᎦᎵᏉᎩ ᎠᏂᏍᎦᏯ ᎤᏁᏅᏎ ᏗᎧᎸᎬ ᎢᏗᏜ ᏄᎾᏅᏛᎾ ᎾᎿ ᏩᏂᎪᏛᎢ. ᎠᏎᏃ ᎠᏂᎪᏖᏃᎮ ᎾᏍᎩ ᏂᎦᏗ ᎤᏬᏢᏅᏅᎯ. ᎤᎾᏕᎶᎰᎯᏍᏗᎢ ᏩᎾᏛᏁᏗ ᏚᏂᏢᎬ ᎣᏂᏃ ᏴᎢ ᎢᎤᏁᏅᏎ ᎤᏍᏗ ᎤᏜᏅᏛ ᏭᎦᏛᎴᎯᏍᏛ ᏭᏂᎦᏛᎴᏎ ᎣᏓᎸ ᏭᏂᎷᏣ ᎤᏬᏚᎯ ᎤᎨᏓᎵᏴᎢ ᏙᏓᎸ ᎬᏩᏚᏫᏓ ᏭᏂᎷᏣᏃ ᎠᏰᎵ ᎤᎨᏓᎵᏴ ᎤᏂᏰᏍᏛᏁ ᎠᏫ ᎦᏁᎦ ᎾᏍᎩᏃ ᎣᏍᏓ ᎢᎬᏁᎸ ᎨᏎᎢ ᎤᎦᏛᎲᏍᎩᏃ ᎤᎾᏕᎶᎰᏍᏗᎢ ᎦᏅᏃ ᏩᏃ ᏚᏂᎸᎮ ᎠᎴ ᎦᏁᎩᏎᎢ. ᎠᎴ ᏂᎦᏓ ᏚᎾᏦᏔᎮ ᎠᏫ ᎦᏁᎪᎯ ᏅᎩ ᎢᏳᏩᎫᏘ. ᏞᎩᏃ ᎤᎾᏛᎦᏁ ᎠᏴᏓᏆᎶᏍᎩ ᎠᏴᏓᏆᎶᏍᎬ ᏗᏓᎴᎲᏍᎨ ᎣᏓᎸ ᎬᏩᏚᏫᏓ ᎠᎴ ᎾᏍᎩ ᏄᎵᏍᏔᏁ ᏅᎩ ᎢᏳᏣᎫᏘ ᎠᏂᎪᏘᏍᎨᎢ ᎠᎾᎦᎵᏍᎬ ᎠᎴ ᎠᏴᏓᏆᎶᏍᎬ ᎬᏩᏚᏫᏓ.

     ᎤᏍᏆᏃᏴᎬᏃ ᎣᏓᎸ ᏗᏓᎴᎲᏍᎨ ᏢᏓᏥ ᏣᎾᏝᎢᏐ ᎾᏍᎩᏯᎢ ᎨᏎᎢ. ᏢᏓᏥᏃ ᏂᎬ ᎬᏩᏚᏫᏓ ᎤᎾᏝᎥᏍᏔᏁ ᎣᏓᎸᎢ ᏅᎩᎭ ᎢᏳᏩᎫᏘ. ᏓᎾᏛᎩᏍᎨᏃ ᏚᎾᏍᏓᏃᏴᎬᎢ ᎣᏓᎸᎢ ᎬᏙᏚᏫᏓᏃ.

     ᎠᎴ ᏏᏊ ᎤᎾᏛᎦᏁ ᎤᎾᏆᏃᏴᎬ ᎣᏓᎸᎢ ᎠᎴ ᎧᏁᎬ ᎤᎾᏛᎦᏁ ᎦᎪ ᎡᏥᎦᏖᏃᎭ. ᎠᎴ ᎠᏂᎦᏔᎿᎢ ᎯᎠ ᏄᏂᏪᏎᎢ. ᎣᏥᎦᏖᏃᎭ ᎾᏍᎩ ᎤᏬᏢᏅᏅᎯ ᏄᏓᎴᏒᎢ. ᎧᏁᎬᏃ ᏔᎵᏁ ᎯᎠ ᏄᏂᏪᏎ ᎦᏙᎲ ᎢᎡᏥᎦᏖᏃᎭ. ᎯᎠ ᏄᏂᏪᏎ ᎤᏂᏣᏗ ᏚᏂᏢᎦ ᎠᎴ ᏴᏫ ᏓᏂᏲᎱᏍᎦ ᎣᎦᏚᎵ ᎣᎦᏕᎶ ᎣᎦᏕᎶᎰᎯᏍᏗᎢ ᏲᎦᏛ ᏁᏗ ᏦᏥᏍᏕᎸᏗᎢ ᏴᏫ.

     ᎢᎤᏁᏣᏃ ᎯᎠ ᏄᏪᏎ ᎠᏴ ᎾᏍᎩ ᏤᏥᎦᏘᏃᎭ. ᎠᏴ ᎠᏉᏢᏅᏅ ᏄᏓᎴᏒ ᎪᎱᏍᏗ ᎠᎴ ᎤᏬᏗ ᎤᏯᎸᎢ ᏕᏡᎬᎢ ᎠᎴ ᎧᏄᎸᎢ ᎠᎴ ᎤᎦᎶ ᎠᎴ ᏚᎾᏍᏕᏢᎢ ᎠᎴ ᎤᎦᎶᎦ ᎠᎴ ᏚᎾᏍᏕᏢᎢ ᎠᎴ ᎤᎦᏔᏔᏅᎯ.

     ᎾᏊᏃ ᎦᎵᏉᎩ ᎠᏂᎦᏔᎿᎢ ᎢᎤᏁᏅᏎ ᏴᏫ ᏗᏁᏙᎲᎢ. ᎠᏂᎪᏩᏘᏍᎨ ᎤᏬᏘ ᏂᎬᏊ ᏓᎾᎧᎿᏂᏙᎲᎢ ᎢᎾᎠᎾᎢᏒᎢ.

 

ᏣᎳᎩ ᎤᏂᏃᎮᏅᎯ
ᏧᏃᏪᎳᏅᎢ
ᎠᎵᏣᏙᎲᏍᎩ ᏩᏘ ᎪᏕᏍᎩ ᎠᎴ ᏫᎵ ᎡᏙᎯ
ᎤᎾᎵᏍᏕᎸᏓ ᎠᎵᎩ ᎢᏌᏯ ᏩᎵ ᎢᏌᏯ
ᎦᎷᎩ ᏗᎩᎩᏍᎩ ᎦᏂᏠᎯᏛ ᎩᏢ ᏥᏍᏆᏯ ᏬᏱ
ᏥᎻ ᎩᎦᎨᏎᎷ ᏧᏙᎢᏛ ᏧᏟᎶᏍᏛᏅ ᎯᎠᎾ
ᏣᏓᏟᎶᏍᏗ ᎠᎭᏂ ᏗᎪᏪᎵᎢ.
ᏓᎵᏆ, ᎣᎦᎳᎰᎻ ᏕᎭᎷᏱ, ᎹᏳᎷᎷ
ᏗᏓᎯᎯ

     ᏏᎢ ᏣᎳᎩ ᎠᏰᎵ ᎤᏙᏢᎢ ᏥᎨᏒᎢ ᎠᏏ ᎣᎦᎳᎰᎻ ᏂᎦᎵᏍᏗᎬᎾ ᏥᎨᏒᎢ ᎹᏳᏁᏙ ᎤᏕᏘᏴᏌᏗᏒᎢ. ᏣᎳᎩᏊ ᎤᎾᏓᏅᏖᏗ ᏥᎨᏒᎢ. ᏚᏂᎾᏒ ᏗᎧᏃᏩᏛᏍᏗ ᎠᎴ ᏧᎾᏓᎯᎵᏓᏍᏗᎢ ᎠᎴ ᏧᎾᏕᎶᏆᏍᏗᎢ ᎠᎴ ᎤᏅᏌ ᏗᏂᎳᏫᎩ. ᏣᎳᎩ ᏓᏂᎳᏫᎨ ᏄᏓᎴᏒ ᏔᎵ ᏗᎦᏬᏂᏍᏗᎢ. ᏣᎳᎩ ᎠᎴ ᏲᏩᏁᎦ ᎠᎾᏁᎸᏗᏍᎩ ᎾᏅᏁᎮᎢ ᏄᏓᎴᏒ ᏌᏊ ᎦᏬᏂᎯᏍᏗ ᎨᏒ ᎠᎴ ᎠᏂᏐᎢ. ᎯᎠᏃ ᎠᎾᏁᎸᏗᏍᎩ ᎤᏣᏘ ᎨᏥᎸᏉᏗ ᎨᏎ ᏴᏫ. ᏅᏗᎦᎵᏍᏙᏗᏍᎨ ᎣᏍᏓ ᎬᏩᏂᏬᏂᎯᏍᏗ ᏂᎨᏒᎾ ᎢᏧᎳ ᏗᎦᏬᏂᏍᎯᏍᏗ ᏅᏗᎦᎵᏍᏙᏗᏍᎨ ᎾᏂᏪᏍᎬ ᏚᏳᎪᏛᎢ. ᏌᏊᏃ ᎾᏍᎩ ᎠᏁᏠᏗᏍᎩ ᎠᏍᎦᏯ ᏚᏙᎥ ᏁᏗ ᏩᏘ. ᎣᏍᏓ ᎠᏍᎦᏯ ᎠᎴ ᏚᏳᎪᏛ ᎠᏍᎦᏯ, ᎠᏎᏃ ᎤᏣᏘ ᎤᏦᏎᏘ ᎤᏩᏛᎮᎢ ᏅᏗᎦᎵᏍᏙᏗᏍᎨ ᎢᏳᏍᏗ ᎩᎳᏊᏴ ᎤᎵᏍᏗ ᎨᏎᎢ.

     ᎡᏥᎢ ᎠᎩᏃᎯᏎᎸᎢ ᎨᏒᎢ ᏅᏗᎦᎵᏍᏙᏗᏍᎬ ᏁᏗ ᎤᏙᎯᏯ ᎨᏒᎢ. ᎡᏥᏃ ᏍᎪᎯ ᏳᎦᏘᏴᏓ ᎨᏒᎢ ᎹᏆᏆᏳ. ᎾᎯᏳ ᎨᏒ ᏁᏗ ᎤᏦᏎᏘ ᎤᏩᏛᎲᎩ ᏕᎤᎾᏠᏎ ᏩᏥᏂ ᎡᎯ ᏗᏓᏂᏱᏍᎩ ᎾᎿᎢ ᎤᏍᏗ ᎤᏪᏴᎢ ᎠᏰᎵ ᎦᎸᎳᏗ ᏧᎾᏕᎶᏆᏍᏗ ᎠᎴ ᏓᎵᏆ. ᏝᎮᏃ ᏯᏒᏞᎢ ᎾᎯᏳ ᎤᏯᏖᎾᏊ ᏴᏫ ᏧᏂᏐᎯᏍᏗ ᎤᏃᏢᏎᎢ. ᏁᏗᏃ ᏓᎵᏆ ᏩᎪᏖᎢ ᎾᎿᎢ ᎡᎮᎢ ᏱᏓᏂᎳᏫᎦ ᏗᏂᎳᏫᎩ ᏓᏂᎳᏫᎬ ᎨᏒᎢ. ᏕᏅᎾᎶᏎᎢ ᏗᏓᏂᏱᏍᎩ ᏟᎢᏎ ᎦᏚᎲ ᏅᏓᏳᎶᎡᎯ ᎤᏃᎯᏎᎴᎢ ᎡᏥ ᏲᏩᏁᎬ ᏗᏓᏂᏱᏍᎩ ᎤᎷᏥᎴᎢ ᎤᏪᏴ ᎾᎥᎢ. ᎾᎿ ᏁᏗ ᎠᎹ ᎠᏗᏔᏍᎨᎢ ᎠᎴ ᎠᏥᏍᎩᎾᏕᎢ ᎠᎴ ᎤᏭᏍᏙᎩᏎ ᎦᎶᏇ ᏓᏥᏍᏓᏲᎴ ᏁᏗ. ᎠᏎᏃ Ꮭ ᏯᏥᏲᎴᎢ ᎠᎴ ᏁᏗ ᏚᏓᏍᏓᏲᎴ ᎠᎴ ᎠᏥᎴᎢ ᏗᏓᏂᏱᏍᎩ.

     ᏁᏗ ᏁᎵᏍᎬ ᏗᎧᏃᏩᏛᏍᏗ ᎤᏪᏘ ᏗᏐᏴ ᏗᎬᏩᏲᎵᏎ ᎡᎵᏍᎨᎢ, ᏙᎯᏳᏃ ᎢᎤᏪᏅᏎ ᏙᏦᏓᎸ ᎤᏙᏙ ᎾᎥᏂᎨᎢ ᏬᎯᎶ ᎾᎥᎢ. ᏗᎾᏓᏂᏱᏍᎩ ᎬᏩᏯᎵᎴᎢ ᏙᎯᏳᎢ. ᏁᏗᏃ ᏙᎯᏳ ᎤᏪᏙᏤᎢ ᎢᎪᎯᏓᏊ ᎬᏃᏓ ᎨᏒᎢ. ᎤᏂᏂᏴᎮᏃ ᏄᏓᎴ ᎠᏍᎦᏯ, ᏁᏗ ᏁᏩᏗ ᏧᏙᎢᏓ, ᎤᏂᎯᎵᏙᎴᏃ ᎤᏓᎸᎢ. ᎠᏎᏃ ᏚᏂᏲᏒᏊᏃ, ᏅᏗᎦᎵᏍᏙᏗᏍᎬᎢ ᏁᏗ ᏩᏘ ᏕᎧᏃᎯᏎᎲ ᎾᏂᎥᎢ ᎠᏴ ᏥᏲᎸᎢ ᏗᏓᏂᏱᏍᎩ ᎠᏋᏌ ᎦᎵᏍᏕᎵᏍᎬᎢ. ᎾᎯᏳᏃ ᎸᏢ ᏁᏗ ᎤᏠᎩ, ᏁᏂ ᎤᏴᏠᏱ ᏧᏙᎢᏓ, ᎤᏎᎵᏔᏅᎯ ᏫᏍᎩ ᎤᏍᏛᏗᏍᎩ ᏓᎾᏓᏱᎵᏙᎲ ᎤᏡᏗᏍᎩ ᎠᏍᎦᏯ, ᏏᏆᏂᏓ ᎠᏬᎯᎶ ᏧᏙᎢᏓ. ᏏᏆᏂᏓᏃ ᎤᏪᏅᏎ ᎠᎴ ᏭᏲᎴ ᏁᏂ ᎤᏴᏠᏱ ᎠᎴᏯ ᎤᏍᏗ ᎦᏁᎮᎢ ᎾᎯᏳᎢ. ᎤᏲᎱᏎᏃ ᎠᏥᏐᏅᏅ ᎹᏕᏘᏴᏓ ᏭᏟᏯᎶᏝ ᎠᎾᎵᏍᎩᏍᎨᎢ ᎤᏔᎾ ᎦᎵᏦᏕ ᎾᎥ ᏬᎯᎶᎢ ᏗᎦᏄᎪᎬᎢ. ᏏᏆᏂᏓ ᏬᎯᎶ ᎤᏪᏅᏎ ᎠᎴ ᏫᏚᏍᏓᏲᏏᎶᎡᎢ ᎠᎴ ᏂᎦᏓ ᏚᎨᎯᏙᏁ ᏴᏫ. ᎾᏂᎥ ᎤᏩᏌ ᏁᏗ, ᏭᏴᎴᎢ ᏏᏆᏂᏓ ᏗᏯᎥᎢ ᎠᎴ ᎩᎳᏯᏴᏓ ᏚᏄᏍᏗᎩᏎ ᏗᎦᎶᏇ, ᎠᎴ ᏏᏆᏂᏓ ᎠᏬᎯᎵ ᎠᏥᎴᎢ.

     ᎣᏂᏃ ᏴᎢ ᏗᎾᏓᏂᏱᏍᎩ ᎤᏂᎷᏤ ᏁᏗ ᎦᏁᎸ ᎠᎴ ᏚᎾᏟᎴ ᎦᎶᏇ ᎬᏗ. ᎠᎴ ᎤᏂᏲᎴᎢ ᏁᏗ ᎠᏍᎪᎵ ᎠᎴ ᏍᏊ ᎠᏥᏐᏅᏁᎢ. ᏗᎾᏓᏂᏱᏍᎩᏃ ᎤᏂᏥᏍᎵᏁ ᎦᎵᏦᏕ. ᎠᏎᏃ ᎾᎥᏳᎾᏓᎵ ᎬᏩᏅᏎᎢ ᎠᎴ ᎬᏩᏍᏆᎾᎪᏔᏁᎢ. ᏴᏫᏃ ᎬᏩᎸᏉᏗ ᎨᏎ ᏁᏗ ᏂᎪᎯᎸ ᎠᎾᏁᎶᏗᏍᎨᎢ ᎬᏩᏃᏎᏗᎢ ᏗᎾᏓᏂᏱᏍᎩ ᏯᏁᏙᎭ.

     ᏌᏊ ᎢᏳᏩᎫᏘ ᏁᏗ ᎤᎵᏦᏓ ᎾᎥ ᎤᏔᎾ ᏬᏱ ᎤᎾᎩᎸᏗᎢ ᎾᎥ ᏓᏄᎪᎢ ᎾᎿ ᏴᏫ ᎠᏁᎨ ᏧᏂᏲᏍᏗᎢ ᏬᏱ. ᎠᏍᎦᏯᏃ, ᏠᏍᏓᎹ ᏓᎶᏂ ᏧᏙᎢᏓ, ᎾᏍᏊ ᎤᎵᏦᏖ ᎾᎥᏂᎨᎢ. ᎠᏣᎳᎩ ᎤᎬᎭᎵ ᎨᏎᎢ ᎠᎴ ᏍᏆᏂ ᎤᎬᎭᎵ ᎠᎴᏍᏊ ᏗᏓᎯᎯ ᎨᏎᎢ ᎤᏛᎦᏅ ᎨᏎᎢ ᏁᏗ ᏗᏓᎯᎯ ᎨᏒᎩ ᎠᎴ ᎤᏚᎵᏍᎨ ᏧᎾᏠᎯᏍᏗᎢ ᎠᎴ ᏧᎾᏓᏍᏓᏲᏍᏗᎢ. ᎤᏛᎦᏅᏃ ᏁᏗ ᎡᏙᎲ ᎾᎿ, ᏓᎳᏚ ᏗᎦᎳᏗᏍᏗ ᏭᏴᎮᎢ ᎠᎴ ᎯᎠ ᏄᏪᏎ ᏓᎨᏏ ᏫᏓᏥᎵ ᏁᏗ ᏩᏘ. ᎠᏎᏃ ᏗᎬᏃᏗᏍᎩ ᏌᎶᎵ ᎤᏛᎦᏁ ᎠᎴ ᎤᏪᏅᏒ ᏁᏗ ᏧᎵᏦᏛ ᏭᏃᎯᏎᎴᎢ. ᏙᎯᏳᏃ ᏓᎶᏂ ᎤᎩᎸᏗ ᏓᎳᏚ ᏗᎦᎳᏗᏍᏗ ᎦᏁᎲᎢ ᏁᏗ ᎤᏓᎵᏐᏍᏔᏁᎢ ᎠᎴ ᎠᏥᏲᎴᎢ ᎦᏳᎶᎩᎢ ᎬᏩᎩᎵ ᏍᏆᎳ ᎦᎶᏇ ᎬᏗ.

     ᎠᎴ ᏅᏩᏓᎴ ᏗᏓᎯᎯ ᎤᏪᏘ ᏗᏐᏴ ᎡᎯ ᎤᏚᎵᏍᎨᎢ ᏧᎾᏠᎯᏍᏗ ᏧᎾᏓᏍᏓᏲᏍᏗ ᏁᏗ, ᎠᏎᏃ ᏁᏗ Ꮭ ᏳᏚᎵᏍᎨ ᏧᎾᏓᎪᏩᏛᏗᎢ ᎨᏯᏔᎮ ᏄᎵᏍᏙᏔᏂᏙᎴᎢ ᏚᎾᏠᏎᎢ ᏅᏃᎯ ᏌᏊ ᎢᎦ. ᎾᏍᎩᏃ ᎠᏍᎦᏯ ᎤᏛᏛᏁ ᏁᏗ ᎾᏍᎩ ᏁᏗ ᏩᏘ ᏱᎩ. ᏁᏗ ᏄᏪᏒ ᎤᏙᎯᏳ ᎠᏴ ᏁᏗ ᏩᏘ. ᎾᏊᏃ ᎠᏍᎦᏯ ᏓᏥᏍᎩᎾᏕ ᏁᏗ ᎠᎴ ᎦᎶᏇ ᎤᏭᏍᏙᎩᏎᎢ ᎢᏧᎳᏃ ᏧᎾᎩᎸᏗ ᎨᏎᎢ ᎠᎴ ᏂᎦᎵᏍᏗᏍᎬᏊ ᏚᎾᏓᏍᏓᏲᏞᎢ, ᎠᏎᏃ ᏁᏗ ᎤᎵᏍᏆᎵᏎᎴᎢ ᎨᏯᏔᎯ ᏧᏍᏓᏲᏍᏙᏗ ᎧᏃᎨᏂ ᎠᎴ ᎤᎦᏔᎲᏍᏗ ᏄᎵᏍᏔᏁᎢ ᎠᎴ ᎤᏓᎾᏫᏍᏔᏁᎢ. ᏁᏗ ᏂᎬᏫᏍᏕ ᏓᏍᏓᏲᎯᏱᎢ ᎠᎴ ᎠᏥᎴᎢ ᏂᏚᏓᎩᏴᏫᏯ.

     ᎠᎴ ᏁᏗ ᎨᏯᏔᏩᏕᎨ ᏔᎵ ᎠᎴ ᏦᎢ ᏧᏕᏘᏴᏓ, ᎤᏂᏣᏗ ᏗᎾᏓᏂᏱᏍᎩ ᎠᎴ ᎠᏂᏯᏫᏍᎩ ᎤᏪᏘ ᏗᏐᏴ ᏅᏓᏳᏂᎶᏒᎢ ᏚᎾᏚᏫᏍᏔᏁᎢ ᎦᎵᏦᏕ ᏗᎬᏩᏂᏲᏍᏗ. ᎠᎾᏟᎲᏃ ᎤᎾᎴᏅᎮᎢ ᎢᎦᏊ ᏥᏂᎦᎵᏍᏗᎭ ᏝᏃ ᏙᎢ ᏱᏄᎵᏍᏔᏁ ᎤᎩᏨᏓ ᏑᎾᎴ ᎢᎪᎯᏓ. ᏗᎾᏓᏂᏱᏍᎩᏃ ᎦᎵᏦᏕ ᏚᏄᎪᏔᏁᎢ ᎠᏂᏌᏙᏱᏎ ᏓᏆᎴᎷ ᎧᎵ ᏗᏐᏯᏍᏗ ᎠᎬᏱ ᏗᏜ ᏂᏚᏅᏁᎢ, ᎠᎴ ᏫᏚᎾᏗᏅᏎᎢ ᏗᏔᏍᎩᏍᎩ ᎭᏫᎾ ᏗᏜ ᎦᎵᏦᏕ ᎤᏥᎳᏤᏃ ᎠᎴ Ꮭ ᏱᎦᏃᎸᏍᎨᎢ ᎠᎴ ᏧᎦᏒᏍᏗ ᎦᏙᎯᏊ ᏗᏜ ᏄᏍᏕᎢ ᎦᎵᏦᏕ. ᏁᏗᏃ ᏚᏒᏁᎢ ᎦᏂ, ᎾᏊᏃ ᎤᏓᎾᏫᏍᏔᏁᎢ ᏧᎦᏒᏍᏗ ᏚᎦᏒᏍᏛᎢ, ᎤᏁᎶᏔᏁᎢ ᏧᎦᏒᏍᏗ ᏚᎦᏒᏍᏗ, ᎤᏁᎶᏔᏁᎢ ᏧᏓᎩᏯᏍᏗᎢ, ᎠᎴ ᎩᎶ ᎢᏳᏍᏗ ᎤᏍᎦᏒᎾ ᎠᏓ ᏡᎬ ᎤᏢᎨᎲᏕᎢ. ᏁᏗᏃ ᎠᏊᏴ ᎤᏢᏍᏔᏁᎢ ᎠᎴ ᎦᏙᎬᎢ ᎤᏜᏢᏍᏔᎾᏃ ᎠᏥᏲᎴᎢ ᎣᏂ ᏗᏜ ᎠᏍᎪᎵ.

     ᎡᏥᏃ ᏦᎦᏚ ᏳᏕᏘᏴᏓ ᎨᏎᎢ. ᎢᏯᏃ ᏂᎦᏪᏍᎬ ᏁᏗ ᎣᏍᏓ ᎠᏍᎦᏯ ᎨᏒᎩ ᎠᎴ Ꮭ ᏳᏲᎮᎢ. ᎠᏎᏃ ᏅᎩ ᏳᏓᏢᎯ ᎨᏒᎩ ᎤᏙᎯᏳᏃ ᎬᏩᎨᎯᏙᎲᎢ ᎬᏂ ᎬᏩᎳ ᎢᎪᎯᏓ.

 

ᎠᏂᎦᏔᎿᎢ ᎤᎾᏕᎳᎰᏒᎯ

     ᎤᏂᏃᎮᏢᎢ ᎪᎯᎩ ᏥᎨᏒᎢ ᎤᏪᏘ ᎠᏰᎵ ᎤᎾᏙᏢᏒᎢ ᎦᎵᏉᎩ ᎠᏂᎦᏔᎿᎢ ᎠᎴ ᎦᎸᏉᏗᏳ ᎤᏂᏯᎢ ᎠᏂᏍᎦᏯ ᎤᏁᏅᏎ ᎢᎸᏢᎢᏴᏛ ᎤᎨᏓᎵᏴᎢ ᏙᏦᏓᎸᎢ ᎤᏂᏯᎸᏎ ᎤᏂᎦᏙᎲᏍᏗᎢ ᎢᏳᎵᏍᏔᏂᏓᏍᏗ ᎤᏩᎫᏗᏗᏒᎢ. ᎾᏍᎩᏃ ᎦᎵᏉᎩ ᏧᏂᏴᏫ ᎠᏂᏣᎳᎩ ᎾᏍᎩ ᎦᎵᏉᎩ ᎠᏂᏍᎦᏯ ᏚᏂᏳᎪᏛᎢ ᎨᏎᎢ ᎠᎴ ᎤᎶᏒᏍᏗ ᎤᎾᏓᏅᏘ ᎨᏎᎢ ᎠᎴ ᎤᎶᏒᏍᏗ ᎤᏚᎸᏗ ᎠᎴ ᏂᎦᏓ ᎠᏂᎾᏍᏔᎸᎢ. ᎤᏂᏫᏛᎮ ᎤᏬᏘ ᎠᎴ ᎠᏫ ᎦᏁᎦ ᎠᎴ ᎤᏬᏘ ᏦᎳᏃ ᎠᎴ ᏄᎾᏛᏁᎴ ᎦᎵᏉᏗ ᎨᏒ ᎠᎾᎢᏒᎢ. ᎠᎴ ᏭᏂᎷᏣ ᎾᎿ ᎤᎨᏓᎵᏴ ᎤᏂᏰᏍᏛᏁ ᎠᏫ ᎦᏁᎦ ᎠᏰᎵ ᎠᎴ ᎤᎾᏓᏙᎵᏍᏔᏁᎢ ᎯᎠ ᎾᏂᏪᏍᎨ ᎡᎳᏗ ᎾᎾᏓᏛᏁᎮᎢ ᎤᏂᏲᎮᎢ ᏚᏳᎪᏛ ᎨᏒ ᎤᎾᏠᏯᏍᏙᏗ ᏴᏫ. ᎾᏊᏃ ᏚᎾᏦᏔᎮ ᎠᏫ ᎦᏁᎪᎯ ᎠᏂᏏᏴᏫᎭ. ᎠᎴ ᎤᎾᎦᏎᏍᏕ ᏧᎦᏒᏍᏗ ᏩᎦᏛ ᎤᏰᎸᏛ ᎤᏁᎳᏅᎯᎢ. ᎯᎠᏃ ᎤᏂᏍᏆᏓ ᎢᎤᏁᏅᏎᏃ ᏫᏚᏂᏃᎯᏎᎴᎢ ᏴᏫ ᎤᏍᏆᏂᎪᏗ ᎤᏂᎪᎲᎢ. ᏌᏊᏃᎢ ᎠᏍᎦᏯ ᎯᎸᏢᏴᎢ ᎠᏂᏃᎯᎵᏙᎮᏍᏗ ᎦᎸᎶᎯ. ᏐᎢᏃ ᏚᎪᎮ ᏚᎾᎳᏍᎬ ᎠᏂᏣᎳᎩ ᎢᎸᏢᎢᏴᏓ ᎤᏕᎵᎬ ᏗᏜ ᎢᎪᏗ ᎠᏍᏛ ᏍᎦᏍᎩᏲ ᎠᎹᏳᎶᏗ ᏫᏗᎦᏃᏴᎦ ᏚᎾᎳᏍᎬᎢ ᎩᎾᏁᎶᏔᏅᎯ. ᎢᎸᎯᏳ ᎤᏂᎷᎯᏍᏗ ᏂᎨᏒᎾ. ᏐᎢᏃ ᏙᏛᎾᏕᎶᏆᎢ ᏧᎾᏕᎶᏆᏍᏗᎢ ᎠᎦᏙᎲᏍᏗ ᏂᎦᏓ ᏴᏫ. ᏅᎩᏁᏃ ᎤᏕᎴᎰᏒᎢ ᎯᎠ ᏄᏪᏎ ᏛᏟᏯᎶᎵ ᎠᏂᏫᏄᏣ ᎢᎠᏂᎷᏨ ᏧᎾᏕᎶᏆᏍᏗ ᏅᏓᏳᏂᎶᏒᎯ ᎨᎩᏃᎯᏎᎮᏍᏗ ᎤᏛᏐᏅᎯ ᎦᎾᏍᏔᏢᎯ ᎯᎠ ᎾᏂᏪᏍᎨᏍᏗ ᎪᎱᏍᏗ ᎬᏙᏗ ᏂᎨᏒᎾ Ꮭ ᎪᎱᏍᏗ ᏯᎦᏔᎭ.

     ᏴᏫ ᎠᎾᏓᏅᏖᏍᎨᎢ ᎪᎯᎩ ᎤᏍᏆᏂᎪᏘᏊᎧᎢ ᎦᏙ ᎤᏍᏗ ᎤᏟ ᎠᎦᏙᎲᏍᏗ ᏓᎨᎨᏲᏂ ᏧᎾᏕᎶᏆᏍᏗᎢ ᎨᎩᎾᏎᏍᏛᎢ ᎢᏂᎦᏴᎵ ᎠᎴ ᎢᎨᎩᏂᏪᏎᏗᎢ.