The Sinhala Language Kit for OS X can also be used to create Pali text in the Sinhala alphabet.

This page is encoded as Unicode (utf-8) and requires a compatible browser like Opera and a properly encoded Sinhalese font. If you don't own the Sinhala Language Kit for OS X and don't use a Macintosh, you can view a PDF version of this file.

     එකස්මිං සමයෙ සත්ථා ගණං පහාය එකකොව එකං වනං පාවිසි. පාරිලෙය්යකනාමො එකො හත්ථිරාජාපි හත්ථිගණං පහාය තං වනං පවිසිත්වා, භගවන්තං එකස්ස රුක්ඛස්ස මූලෙ නිසින්නං දිස්වා, පාදෙන පහරන්තො රුක්ඛමුලං සොධෙත්වා සොණ්ඩාය සාඛං ගහෙත්වා සම්මජ්ජි. තතො පට්ඨාය දිවසෙ දිවසෙ සොණ්ඩාය ඝටං ගහෙත්වා පානීය-පරිභොජනීය-උදකං ආහරති. උණ්හොදකෙන අත්ථෙ, සති උණ්හොදකං පටියාදෙති කථං කට්ඨානි ඝංසිත්වා අග්ගිං පාතෙති; තත්ථ දාරූනි පක්ඛිපන්තො ජාලෙත්වා, තත්ථ තත්ථ පාසාණෙ පචිත්වා, දාරුඛණ්ඩකෙන පවට්ටෙත්වා, ඛුද්දකසොණ්ඩියං ඛිපති. තතො හත්ථං ඔතාරෙත්වා, උදකස්ස තත්තභාවං ජානිත්වා, ගන්ත්වා සත්ථාරං වන්දති. සත්ථා තත්ථ ගන්ත්වා නහායති. අථ නානාවිධානි ඵලානි ආහරිත්වා දෙති.

     යදා පන සත්ථා ගාමං පිණ්ඩාය පවිසති, තදා සත්ථු පත්තචීවරමාදාය කුම්භෙ ඨපෙත්වා, සත්ථාරා සද්ධිං යෙව ගච්ඡති; රත්තිං වාළමිගනිවාරණත්ථං මහන්තං දණ්ඩං සොණ්ඩාය ගහෙත්වා යාව අරුණුග්ගමනා වනසණ්ඩෙ විචරති.

     අතිතෙ කිර බාරාණසියං සාලිත්තකසිප්පෙ නිප්ඵත්තිං පත්තො එකො පීඨසප්පී අහොසි. සො නගරද්වාරෙ එකස්ස වටරුක්ඛස්ස හෙට්ඨා නිසින්නො සක්ඛරා ඛිපිත්වා තස්ස පණ්ණානි ඡින්දන්තො හත්ථිරූපකං නො දස්සෙහි, අස්සරූපකං නො දස්සෙහි ති ගාමදාරකෙහි වුච්චමානො ඉච්ඡිතිච්ඡිතානි රූපානි දස්සෙත්වා තෙසං සන්තිකා ඛාදනීයාදීනි ලභති.

     අථෙකදිවසං රාජා උය්යානං ගච්ඡන්තො තං පදෙසං පාපුණි. දාරකා පීඨසප්පිං පාරොහන්තරෙ කත්වා පලායිංසු. රඤ්ඤො ඨිතමජ්ඣන්තිකෙ රුක්ඛමූලං පවිට්ඨස්ස ඡිද්දච්ඡාය සරීරං ඵරි. සො කින්නුඛො එතං ති උද්ධං ඔලොකෙන්තො රුක්ඛස්ස පණ්ණෙසු හත්ථිරූපකාදීනි දිස්වා කස්සෙතං කම්මන්ති පුච්ඡිත්වා, පීඨසප්පිනො ති සුත්වා තං පක්කොසාපෙත්වා ආහ මය්හං පුරොහිතො අතිමුඛරො, අප්පමත්තකෙපි වුත්තෙ බහුං භණන්තො මං උපද්දවති සක්ඛිස්සසි තස්ස මුඛෙ නාළිමත්තා අජලණ්ඩිකා ඛිපිතුන්ති. සක්ඛිස්සාමි දෙව අජලණ්ඩිකා ආහරාපෙත්වා පුරොහිතෙන සද්ධිං තුම්හෙ අන්තොසාණියං නිසීදථ. අහමෙත්ථ කත්තබ්බං ජානිස්සාමිති.

     රාජා තථා කාරෙසි. ඉතරොපි කත්තරියග්ගෙන සාණියං ඡිද්දං කත්වා, පුරොහිතස්ස රඤ්ඤා සද්ධිං කථෙන්තස්ස මුඛෙ විවටමත්තෙ එකෙකං අජලණ්ඩිකාං ඛිපි. පුරොහිතො මුඛං පවිට්ඨං පවිට්ඨං ගිලි. පීඨසප්පි ඛීණආසු අජලණ්ඩිකාසු සාණිං චාලෙසි. රාජා තාය සඤ්ඤාය අජලණ්ඩිකානං ඛීණභාවං ඤත්වා ආහ ආචරිය, අහං තුම්හෙහි සද්ධිං කථෙන්තො කථං නිත්ථරිතුං න සක්ඛිස්සාමි. තුම්හෙ අතිමුඛරතාය නාළිමත්තා අජලණ්ඩිකා ගිලන්තා පි තුන්හිභාවං නාපජ්ජථාති.

     බ්රාහ්මණො මංකුභාවං ආපජ්ජිත්වා තතො පට්ඨාය මුඛං විවරිත්වා රඤ්ඤා සද්ධිං සල්ලපිතුං නාසක්ඛි. රාජා පීඨසප්පිං පක්කොසාපෙත්වා තං නිස්සාය මෙ සුඛං ලද්ධන්ති තුට්ඨො තස්ස සබ්බට්ඨකං නාම ධනං දත්වා නගරස්ස චතූසු දිසාසු චත්තාරො වරගාමෙ අදාසි.